太陽報－反戰回憶12吋奸角梟雄

广阔的宇宙 · 发表于 2010-11-4 01:45

反戰回憶12吋奸角梟雄
近年Hot Toys嘅12吋Figure都以忠角為主，Ironman、Batman，加埋李小龍……個個都係名門正派，自然多Fans。不過有正就有邪，正如曹操都有知心友，好似之前《希魔撞正殺人狂》個Landa軍官，Figure化後就極受軍事迷歡迎。為滿足奸角粉絲，HT Movie Masterpiece再添新成員——《殺戮戰場》嘅大奸狗Bob Barnes，軍服100%還原唔在講，連臉上疤痕亦忠實呈現，似足真人咁樣衰！刀疤面　邪過真人
講起《殺戮戰場》，10個粉絲、9個都會想起主角查理辛，不過數最搶眼嘅角色，反而係奸角Bob Barnes，唔只令演員Tom Berenger勇奪1986年奧斯卡男配角獎，早前外國電影網仲評佢為史上百大奸角之一，可想而知幾咁經典。HT攞到《殺戮戰場》版權後，早就講明會同SideShow一樣，出齊所有角色，Bob Barnes自然榜上有名。就試辦嚟睇，雕頭師Song Hye Hyun嘅功力又再升呢，輪廓、雙眼都貼近真人，驟眼睇，甚至比電影更有邪氣；最重要係廠商放棄以往面相一定要對稱口嘅原則，忠於原著喺右邊臉雕咗大大條疤痕，加埋JC.Hong嘅高水準塗裝，神似度爆燈！
頭盔大咗　Parts唔多
服飾方面，HT以軍事人形起家，要還原越戰時嘅美軍軍服，自然Easy Job，無論剪裁、比例都有上佳水準，唔會有衣不稱身嘅感覺，而且槍袋及軍靴都跟足越戰款式，相信可滿足奄尖嘅軍事迷。若要雞蛋裏挑骨頭，就係為咗遷就戴頭巾後嘅頭形，頭盔設計略嫌大咗啲，戴上後有啲頭大身細，「驗屍官」一定鬧爆！另一樣要鬧係武器太少，只有M16步槍、M1911 A1手槍、手榴彈及刺刀，相比起《殺》系第一款Figure Chris Taylor嘅大推頭Parts，呢隻Bob Barnes明顯唔夠Fight！