太陽報－竹谷隆之×鬼木祐二×HT血獸武士道

广阔的宇宙 · 发表于 2011-12-1 09:10

竹谷隆之，日本殿堂級原型師，作品包括《未來忍者》、《幪面超人S.I.C.》，曾合作嘅單位有雨宮慶太、桂正和、海洋堂、Bandai等等，不能盡錄，總之個個有名、粒粒皆星。由今日開始，以上單位再多一個香港名字—Hot Toys，事關兩者聯乘炮製1/6 Samurai Predator，恐怖血獸喺大師雕琢下，逼力趨至巔峰，一身武士裝斬爆異形外，仲斬到一眾玩家一頸血！
竹谷隆之呢個名，可能對玩開美系玩具嘅人較為陌生，但若閣下從小已經接觸日系首辦嘅話，就一定擁有呢位鬼才嘅作品。不過大師過往主打半胸像、情景模型等Art Statue，今次係首度設計1/6可動Figure，新鮮感已經爆晒燈！
緣於十周年
講到新鮮感，HT近年稍為欠奉，當作品向Movie Master Series歸邊，Iron Man、蝙蝠俠出完再出時，已經好難再叫非死士級玩家或非影癡乖乖掏腰包。為咗開闢新路線，近年HT積極尋求與不同單位合作，例如先前與SideShow合力炮製Luke Skywalker，今次輪到原形大師竹谷隆之，惟據聞大師極度「高竇」，又如何促成今次合作呢？HT話事人Howard解畫︰「竹谷老師一直係我偶像，去年HT十周年展喺東京舉行，由J.C.Hong引薦下終於識到對方。席間我哋除咗交流玩具心得，亦尋求過合作機會，嗰時大師表示早就對Action Figure有興趣，奈何好多廠商喺量產後都難以保持水準，慶幸佢對我哋有信心，經一年努力後，試辦終於面世。」
武士道精神
雖然大師擅長重新詮譯日本家傳戶曉嘅動漫角色，但係設計血獸已經唔係第一次，早年曾經與SideShow合作過「血獸與骷髏馬」，令一眾獸迷大開眼界。今次Samurai Predator雖然建基於科幻電影《AVP》，但喺大師設計與塗色下，形像儼如沙場上嘅日本武士，散發出嘅武士道精神，正正與崇武嘅血獸不謀而合。試辦仲有由另一大師鬼木祐二操刀嘅頭雕，比過往任何一款血獸都要血腥猙獰，辮子頭喺軟膠加持下亦更見層次感，再非垂直落下咁求其。一如過往，血盆大口有開合兩款組件替換，最驚喜係內部嘅怪嘴都可以開合，樣衰程度達至極點。
斬爆異形頭
素體方面，雖然取材自同廠《Predators》嘅一眾血獸，同為14吋高、有22個關節，但大師改良後外觀截然不同，例如以前滿身蜥蜴紋，如今變得平滑乾淨；以往肌肉較自然，如今引入大師嘅解剖學風格，胸腹爆晒肌。盔甲方面，頭盔一分為三，需以組件方式戴上，下身麻布就刻意整到披口走線，呈現舊化感覺，可惜盔甲雖然有金屬感，不過着咗會令Figure可動性大打折扣，期望大貨時能再作改善。另外，日本武士喜歡收集敵人首級做紀念，血獸除咗有佩刀及五金刀外，仲送埋異形被斬首地台。
竹谷隆之×鬼木祐二×HT 1/6 Samurai Predator
零售價︰$2,380

預訂價︰$2,330

VIP預訂價︰$2,250

發售日期︰明年第2季尾

查詢︰2388 4677（玩具狂熱）

＊圖中為試辦款式，與正式推出的版本或有少許分別。

今次HT與竹谷隆之合作，將荷里活嘅科幻角色變得東洋化，堪稱今年HT最有創意嘅大作。

異形地台極具逼力，細緻度更媲美電影道具，淨係呢Part已值回票價。

武士頭盔要分三件戴上較為麻煩。

血盆大口用組件方式替換，內部嘅怪嘴仲打得開，血獸Figure中首見。

竹谷隆之最叻突出肌肉紋理，今次炮製血獸都唔例外，驟眼睇仲有幾分S.I.C.味道。

膊頭有加農炮，但只可以左右轉，前後滑動唔到。