太陽報－女神再索啲HT 1/6 Black Widow

广阔的宇宙 · 发表于 2012-6-26 09:22

為咗迎接夏天，女士們都會積極瘦身、豐胸、減躉，務求以最Fit體態示人，勢估唔到，呢股變靚熱潮都吹到Figure界，Hot Toys新發表嘅1/6 Black Widow就採用全新Body，由頭到腳都大執過，以最接近真人方式重現女神Scarlett Johansson嘅婀娜美態。
《The Avengers》叫好叫座，Black Widow更係睇得又打得，就算企埋Hawkeye等一班大男人身邊都搶晒鏡；女神粉絲眾多，HT對Black Widow都不敢怠慢，特別搵咗好耐未有新作嘅首席女造型師Yulli出山，配合JC.Hong嘅塗色，令雙目、彩唇、輪廓同膚色都似足真人。據HT表示，為求盡善盡美，佢哋仲先後三次將試辦交畀電影公司審批，將頭雕改得更加Human-being先出街。
植髮還原嫵媚
朗尼植髮後連球運都返晒嚟，新版Black Widow亦靠呢招變得更省鏡，HT原先想用軟膠頭髮，不過效果未如人意，所以改番植髮，不但似足戲中又短又鬈嘅造型，玩家仲可以用熱水或髮泥幫佢Set頭，過足改裝癮！Body就係全新設計，收膊、收腰之餘，巨躉都收斂埋，緊身衣下嘅股線更加誘人。另一方面，由於Black Widow要應付大量動作場面，廠方特別喺手肘加入雙關節，令屈曲度超過90°，可以擺出交叉手握槍嘅招牌動作。
兩個月塑胸期
Black Widow今集嘅戰鬥服繼續緊身，HT就用薄身兼高彈性嘅複合拉架物料處理，再透過滴膠技術喺衫身表面加入七層暗紋，細心睇真係同戲服冇咩分別。另外，Scarlett Johansson出名胸前偉大，之前嘅《Iron Man 2》Figure就因為衫身太緊令胸形走樣，今次廠方先替Body着好衫，之後先慢慢「塑胸」，用足兩個月時間，令胸形自然番晒，睇怕宅男見到會鼻血決堤。
後記：炒家出手玩家喊晒口
新版Black Widow索到爆，就連定單都咁爆，收訂至今只係一個星期左右，截稿時啱啱收到消息，HT嘅官方門市Toy Hunters已經爆Quota，未落訂嘅玩家惟有向其他門市打聽，或者等正式派貨時，會唔會仲有滄海遺珠嘅Walk in貨畀你搵到；最唔開心係唔少人將定單擺上網Bid，擺明係炒家！唉……相信咁嘅情況，HT本身都唔想見到，希望佢哋會諗到新辦法，令真正嘅玩家唔使捱炒價，可以更公平、公正嘅方式買到心頭好啦！

零售價︰$1,180

推出日期︰今年第四季