太陽報－HT屈肌超人

广阔的宇宙 · 发表于 2013-6-18 12:02

最近全城焦點都落喺鋼條筋肉男張家輝身上，化骨龍「轉肌」固然吸引，不過套戲有排都未上，睇怕風頭快會畀下個禮拜上嘅《Man of Steel》（超人︰鋼鐵英雄）Henry Cavill搶走，想提早知佢點屈「肌」，不妨透過Hot Toys新發布嘅1/6版本先睹為快，肌肉Body由專人親手打造，加埋個超像真頭雕，屈機到爆喇！
還原憂鬱表情
Henry Cavill早於2004年已經被鎖定為新一代超人，後來因為導演被換，先畀Bradon Routh冷手執個熱煎堆，最後一如所料拍成劣評如潮嘅《Superman Returns》。苦等多年，超人終於翻拍，監製換上講求真實感嘅《The Dark Knight》導演Christopher Nolan，得個樣嘅Brodon自然被飛。或者箇中轉折加深咗Henry嘅人生閱歷，從Trailer所見，佢嘅表情鬱結難解，HT首席頭雕師Yulli就將呢份特質放喺今次嘅1/6 Figure身上，並且同時還原其高額角、高鼻樑及薄唇等面部特徵，配合帶點蒼白嘅膚色塗裝，將超人嘅黯然神傷一面立體化起嚟。

激凸模範身材
《Man of Steel》由《戰狼300》導演Zack Snyder執導，此君愛拍筋肉男，Henry自然要瘋狂操肌，Figure版本當然冇得舉鐵做Gym，亦冇電腦特技幫助，所以HT特別搵嚟擅長雕畫肌理嘅Joseph Tsang擔任素體造型師，並且以高純度嘅環氧樹脂打造其緊身戰衣。就試辦所見，素體保持不俗嘅可動性，手腳可以自然屈到，唔似以前嘅包膠「硬直」之餘，肌肉感更為澎湃，膊頭肌、胸肌甚至腹肌都清晰可見。加上HT仲嫌唔夠睇頭，透過移印技術喺戰衣嘅適當位置打埋陰影，令Figure從任何角度睇都異常激凸！另外，雖然新版超人冇咗經典嘅紅底橫，但紅色披肩就保留，並且刻意抽走鐵線，改為多層摺疊，一減舊版超人擺甫士時嘅硬繃繃感覺。

HT MMS200《Man of Steel》1/6 Superman
零售價︰$1,280

預訂價︰$1,230

推出日期︰2014年第一季

查詢︰2388 4677（Toy Hunters）

＊圖中為試辦款式，與正式推出的版本或有若干分別。

HT MMS200《Man of Steel》1/6 Superman

Body為全新打造，除咗有30個關節，高度仲有成31cm，比一般1/6 Figure稍高。

由Yulli落刀已經係信心保證，加埋個憂鬱表情，頭雕冇得輸！

披肩直接與緊身衣縫合，駁位順眼晒。

為咗營造立體感，心口嘅「S」標誌特別用PVC製作。

披肩兩邊冇鐵線，變得自然貼服。

長靴由布料及PVC混合製成，筆挺得嚟唔會影響關節靈活性。

戰衣上嘅花紋用滴膠製成，位置、大小都跟足戲服。

環氧樹脂戰衣雖然緊身，但都預留咗空間畀Figure擺動作，唯一尷尬係有摺痕出現。

為咗慶祝超人成為HT嘅第200款MMS，跟盒除咗有1/6 Command Key（左），仲送埋1/1版本。

附件方面，唔同款式嘅造型手掌已經係意料中事，驚喜係地台並非傳統嘅黑色Stand，而係經典嘅超人Logo。

兩代超人比較，新版（左）Sell大隻，舊版就係經典Look，各有特色。