太陽報－HT 10周年大禮　Mark Ⅴ有篋用

广阔的宇宙 · 发表于 2011-1-19 02:13

雖然話Iron Man係Hot Toys嘅銷量台柱，不過除咗Mark Ⅰ，Mark Ⅱ、Ⅲ、Ⅳ、Ⅵ嘅外形其實都大同小異，新鮮感已經慢慢減退。然而，寶物總係沉歸底，萬眾期待嘅Mark Ⅴ終於喺日前嘅東京Hot Toys 10周年展面世，有齊標準及戰損兩款造型，仲跟足電影有篋用，必買！同場仲有多款2011年嘅新作率先睇，奪寶奇兵及雷神等英雄紛紛列陣，粉絲們係時候買多個玩具櫃！
唔只贏盡香港玩家歡心，仲成為國際級Figure名牌，咁威水，HT 10歲大壽，當然要搞大佢啦！揸Fit人Howard Chan就拉大隊到東京舉行《The 1/6 the Scale Renaissance Decade》10周年展，一次過將歷年來所有MMS系列、Cosbaby及TrueType Body晒冷，仲發表埋明年新作，最受注目嘅大作首推Iron Man Mark Ⅴ。
一個價錢兩款造型
歷代Iron Man用色，都離唔開紅撞金，Mark Ⅴ獨特之處，在於跟足電影嘅紅撞銀盔甲，胸甲、腹甲以至大腿位用多層PVC膠打造，配合整個素體，變得更流線，論新鮮感跑贏新出嘅Mark Ⅵ。就試辦所見，Mark Ⅴ左邊身驅零件外露，係會以「戰損版」造型登場；嫌重手得滯，廠商仲會附送標準胸甲及左臂組件，即一個價錢、兩款造型，抵玩！而且送埋流動變身篋，雖然打唔開，但細節位及比例都似到足，唯一遺憾係冇跟Tony Stark頭雕，否則就真係Perfect。
積尼高遜首度玩具化
除咗Iron Man Mark Ⅴ，HT明年仲有大把新作，包括《奪寶奇兵》及《生化危機》，前者嘅福伯以經典牛仔Look亮相，論頭雕及配件，都贏Sideshow幾條街；後者係女主角Milla Jovovich首度被Figure化，配合緊身衣及「周身槍」，儲開女Figure嘅粉絲幾難唔中招。至於《Thor》（雷神）及《Caption America》（美國隊長），以及《魔盜王》、《Sucker Puncil》及《Vinyl》等，HT都會喺明年HT化，最震撼係原祖《蝙蝠俠》嘅小丑（添布頓執導嘅版本）亦會粉墨登場，據HT表示，今次係積尼高遜首次向玩具廠批出肖像權，屆時新舊小丑擺埋一齊，別具意義！

全場矚目
Iron Man Mark Ⅴ（售價︰$1,380）

Mark Ⅴ嘅盔甲由層層PVC疊成，左邊仲有零件外露。而且附送流動變身篋一個，像真度無可挑剔。