太陽報－隊長駕到　HT 1/6 Captain America

广阔的宇宙 · 发表于 2011-6-27 14:05

論人氣，Captain America未必夠Iron Man紅；論好打，血肉之軀嘅佢，同Thor甚至Hulk都相差好遠。不過，呢位於1941年面世嘅漫畫角色，偏偏最能代表Marvel甚至美國英雄漫畫，單係首期封面一拳打落納粹魔頭希特拉，時至今日睇番依然大快人心，作為最瘋狂嘅粉絲之一，Hot Toys老闆Howard當然唔會放過將隊長Figure化嘅機會啦！
Captain America喺美國人心中有好高地位，所以籌拍之初，諗邊個做隊長都搞咗好耐，最後呢個熱煎堆落喺《神奇四俠》火燄仔Chris Evans身上。對電影公司嚟講，唔係大明星好處係片酬收得平，HT亦有得益，就係頭雕容易審批︰「由於Chris嘅輪廓都幾深，所以頭雕師Eom Jea Sung好快就起到貨，最緊要係Chris本人唔難服侍，基本上一Take就Pass！」就首辦所見，戴住膠製頭盔好難話似唔似，只能講寬鼻、厚下唇等特徵都拿捏得到，不過頭盔唔除得，驗貨時咪亂拆呀！
爆肌靠海綿
原本170磅嘅Chris為求演出神似，日日狂食澱粉質同健身奶粉谷肌，最後增到200磅兼有45吋胸肌，不過佢個倒三角上半身配小蠻腰身形，就難倒HT造型師︰「狼人同史泰龍Body夠大隻，但虎背熊腰得滯，同真人唔似，所以我哋諗到用《人．神．魔戰》嘅柏修斯Body，再喺上身猛加海綿，營造爆肌感覺。」藍色戰衣都用咗海綿谷脹，加埋車線技術，令膊頭有番立體感，軍Boot就更抵讚，捨棄常用嘅仿皮，改用軟膠製作，模擬出鞋面褶紋，又不失柔軟度，兩全其美。
電鍍圓盾幾可亂真
Captain America被打入「超級士兵」血清後，體力、速度同耐力都異於常人，唔使用槍、一個飛盾就可以掟死人。原著中嘅圓盾用Vibranium及鐵兩種金屬混合製成，號稱核彈都打唔爛，現實當中唔會有，雖然用不銹鋼都可模擬質感，但會增加成本及重量，所以HT經過多番考慮後，決定用膠料配合多層電鍍處理，令表面帶有金屬嘅反光效果，又唔怕Figure拎唔起。相比之下，衝鋒槍及手槍就略顯失色，而且好似Thor咁冇跟大型地台，賣過千銀似乎貴咗啲，唯一安慰係有九隻替換手掌，可擺到多款甫士。

查詢︰2388 4677（玩具狂熱）